زين الشبان، زينت لبنات صامدين بين الحيطان
قصيدة زجلية مهداة إلى شهيد و معتقلي انتفاضة
مراكش المجيدة ماي 2008
زين الشبان زين الرجالة
فَكدْْني بجيفارا زين الفرسان
زين الشبان زين القامة
فڭدني ببوعبيد عطر من بستان
غنيوا يا الڭوالة على رفاڭي فلسجان
فماي الثورة مَايَةْ لشهر الغضبان
من 4 مايو19 فالصين
ل68 فباريس كان الطلبة ليهم عنوان
أو بتزغريدات مهات الحسناوي و الطاهر زاد زيان
ماي فمراكش مكتوب بالدم على الحيطان
و بروتكال المخزن على الريوس شيالة
قتلو زين الشبان فڭراش الرجالة
ما همهم غير المال شوفوا عمالنا حرڭوهم فالدربالة
زين الشبان زين الرجالة
فڭدني بالمعطي زين الفرسان
يا مزين ذاك النهار يوم
مشيتو شور السملالية
هازين لعلام الحمرا و شعارات ثورية
و قلوبكم معمرة بليمان بالنصر و التضحية
و الشمس بانت من ورا البحورماوية
شحال من من ڭلوب حييتو و سقيتو كم من عطشان
لرض روات و الزريعة نورات أو فاضت الويدان
و نبتت في ارضنا الحمرا قلوب الشجعان
كي زْهُور الصامدة وردة بين القضبان
ريحتها فاحت ياسمين ما حبستها جدران
زينت الورود زينت الخالة
فڭدتني بكْلارا زينت لحسان
دارو بيها الضبوعة، ڭالو ليها انتِ لوزيعة :
نطقي!اعتارفي!ڭري !
جلدوها!صلبوها!نهشوها!ڭري !
لڭاوها صخرة صلبة، أرض عيونها يسقيو بلعمان
كلما فلحوها بالسياط نبتت الزهور و الشواك حارسة لجنان
لا يڭطع "زانطار" شجر الرمان
نطقي!اعتارفي!ڭري !
شكون علمك الثورة؟ شكون عطاك المنجل و المحراث؟
ڭري! علاش صنعت سلاحك من الكتان؟
نطقي! ركبو ليها تريسينتي،ڭري !
أو ضوات كيف الڭمرة في ليلة مظلمة بالآهات :
شجر الزيتون بيديا أنا حرثو،قلبي هديتو أنا للحق عربون، يا وجوه البهتان
و غنايا تعلمتو أنا من الكادحين من طيور السَمّان
عيوني ساڭية للمزلوطين و ظفايري للحدية غصان .
وا هيا ديك زهور الصامدة، وا هيا ديك الڭمرة الضاوية
وا هيا ديك الجمرة الڭادية
إلا سولوك نطقي، اعتارفي، ڭري،ڭولي ليهم، هاني بادية :
سولو سعيدة، سولو زروال
سولو زبيدة، سولو رحال
سولو روزا وكل من زين كتافو بسلاحو أو طلع للجبال
سولو جلال، سولو يونس زين الرجال
سولو حفيظ،، سولو مراد سبع ، غضنفر ما يشدوه الحبال
سولو عبد الله، سولو يوسف زين القامة من عظامو إدَڭْْ أوتاد
يبني مضارب لفجر الفلاحة و العمال
سولو شرف، سولو العربي صقر الشوفة، سيفو ما عمرو يذبال
سولو عثمان ايديه يرعبو لعدا، في عينيه النصر بعينيه مانو خيال
سولو محماد صرختو موال
ويلا ضرب رجليه مع لرض تحت الطغاة تولي زلزال
سولو كل الرفاڭ كل واحد، واحد
لغيام تفاجا و لقلوب المكدرة تزول و إيعود النصر دلال .
خيرت لبنات، خير الشبان ناس الهالة
فڭدوني بالجيش الأحمر، راه عليه الشعوب عوالة .
عبد الرحيم لعرب
ماي 2008
ملاحظة:المستطيل هو القاف الجنوبي